ᐁᓪᓰ ᑕᕝ ᐋ ᒌ ᐋᑎᔫᐦᒑᑦ, ᒋᓵᓰᐲ
ᐱᕌᔨᓐ ᐌᑉ ᐋ ᒌ ᒥᓯᓂᐦᐊᐦᒃ ᑭᔮ ᐋ ᒌ ᐃᑣᔥᑎᒫᑎᐦᒃ
ᑎᐦᒀᐹᑭᔑᐤ ᐆ᙮ ᑖᐹ ᓈᓂᑑ ᓈᔥᒡ ᐃᔮᓂᐎᔨᒑ ᐆ᙮ ᒥᒄ ᓂᒌ ᐹᐦᑎᐙᐤ ᐅᔮ ᐊᐙᓐ ᐋ ᐋᑎᔫᐦᒑᑦ᙮ ᑎᐦᒀᐹᑭᔑᐤ ᐆ᙮ ᒫᐅᑖ ᑳ ᐃᑖᑎᔫᐦᒑᑦ᙮
ᐊᓐ ᒀ ᒋᐦᑳᐹᔥ, ᓈᔥᒡ ᐙᔥ ᐋ ᒫᒫᐦᒌᑖᒋᒥᑯᓰᑦ ᐊᓐ ᒋᐦᑳᐹᔥ᙮ ᒥᓯᐙ ᒀ ᒑᒀᔨᐤ ᐋ ᒌ ᐊᑎ ᐃᐦᑎᒃ᙮ ᐊᓂᑖ ᒀ ᑳ ᐃᑖᑎᔫᐦᒑᑦ ᐊᓐ ᐊᐙᓐ ᑳ ᐋᑎᔫᐦᒑᑦ, ᐋᐅᒄ ᐊᓐ ᐃᔮᐦᑯᓯᑦ ᒋᐦᑳᐹᔥ ᑳᑭᔮ᙮ ᓈᔥᒡ ᐋ ᐋᐦᑯᓯᑦ᙮ ᐋᔨᒋᒑ ᒫᒃ ᐊᓂᔮᔨᐤ, ᑳ ᐃᐦᑎᒃ ᐙᔥ ᒌ ᐃᓈᓂᐤ, ᑳ ᐃᑖᑎᔫᐦᒑᓂᐎᒡ ᒀ, ᒥᓯᐙ ᒑᒀᔨᐤ ᐋ ᒌ ᐐᐦ ᐋᔪᐎᐦᑖᑦ, ᐋ ᒌ ᐐᐦ ᐋᔪᐙᔥᑭᐦᒃ ᒀ᙮
ᐋᔨᒋᒑ ᒫᒃ ᐊᓂᔮ ᐃᔮᐦᑯᓯᑦ ᑳᑭᔮ, ᓈᔥᒡ ᐋ ᐋᐦᑯᓯᑦ᙮ ᐋᔪᐎᒄ ᒫᒃ ᐊᓂᔮ ᓂᒥ ᐱᒫᑎᓰᐤ᙮ ᐋ ᐃᔮᑦ ᑳᑭᔮ, ᒑᑐᐦᑖᑦ᙮ ᐎᔮᐱᐦᑎᒃ ᒫᔅᑭᓂᐤᐦ, ᓃᔑᓂᔨᐤᐦ᙮
ᐹᔨᒄ ᐊᓂᔮᔨᐤ, ᓈᔥᑏᒡ ᑯᔨᔅᒄ ᐃᑎᒧᔨᐤ᙮ ᐅᔮ ᐹᔨᒄ ᒦᓐ ᐅᔮ, ᐋᑳ ᒀ ᓈᔥᒡ ᐃᔑᓈᑯᓂᔨᒡ ᐅᔮ ᐹᔨᒄ ᐋ ᐃᔑᓈᑯᓂᔨᒡ ᐅᔮ ᒫᔅᑭᓈᔨᐤ᙮
ᒥᔮ, ᐋᒄ ᐅᔮ ᐅᐐᐦᒀᔮᒻ ᐙᐅᔑᑦ᙮ ᐅᑖ ᒀ ᐋ ᐊᑎᓂᑳᑎᐦᐊᒃ ᐅᐐᐦᒀᔮᒻ᙮ ᐋᔪᐎᒄ ᐋᒄ ᐅᔮᔨᐤ, ᐊᓂᔮ ᒑᒀᔨᐤ ᐋᑳ ᑯᔨᔅᒄ ᐅᐦᒋ ᐃᐦᑎᒃ ᒫᒀᒡ ᐅᑎᐦ ᐊᔅᒌᐦᒡ ᑳ ᐃᐦᑖᑦ᙮ ᐋᔪᐎᒄ ᐲᒋᔅᑎᓂᔨᒋᒑ ᐅᑎᐦ ᐅᐐᐦᒀᔮᒥᐦᒡ᙮
ᐹᒧᐦᑖᑦ ᑮᑆ᙮ ᒥᔮ, ᒑᒃ ᐙᑎᐦᑖᑦ ᐊᓂᑖ ᒋᔥᑐᐦᑭᓐᐦ, ᐅᑎᐦᐱᒧᐦᑖ ᐅᔮ ᐹᔨᒄ ᑳ ᒥᑎᒫᑦ ᒫᔅᑭᓈᔨᐤ᙮
ᒥᔮ, ᐃᔮᐱᐦᐙᑦ ᐊᓂᔮᔨᐤ ᒋᔥᑐᐦᑭᓐᐦ᙮ ᐱᔮᒋ ᐋᐱᐦᐋᒫᑯᑦ ᐙᔥ ᐊᐙᔨᐤᐦ ᐊᓂᔮᐦ ᒋᔥᑐᐦᑭᓐᐦ᙮ ᐙᓵ, ᓈᔥᒡ ᐋ ᐃᔑᓈᑯᓂᔨᒡ ᐅᑖ ᐃᔥᑯᑖᔨᐤ᙮ ᓈᔥᒡ ᒀ ᐋ ᑯᔅᑖᓯᓈᑯᓂᔨᒡ᙮
ᒥᒄ ᐄᔑ ᒋᐱᐦᐄᐱᑖᐤ ᐊᓂᔮᐦ ᒋᔥᑐᐦᑭᓐᐦ᙮ ᒦᓐ ᒑᑐᐦᑖᑦ᙮ ᐅᔮ ᑯᑎᒋᔨᐤ ᒫᑎᒫᑦ᙮ ᒀᑎᑯᑦ ᐊᓂᔮᐦ ᐊᐙᔨᐤᐦ, ᒑᒃ ᐙᑎᐦᑖᑦ ᒦᓐ ᒋᔥᑐᐦᑭᓐᐦ, ᑖᐹ ᒋᑭ ᒌ ᐹᒋ ᐲᐦᒋᒑᓐ, ᐃᑎᑰ᙮
ᐎᔮᐱᐦᑏᑯᑦ ᒥᓯᓂᐦᐄᑭᓂᔨᐤ᙮ ᐙᐱᐦᑦᐦ ᒫ ᐆ ᒥᓯᓂᐦᐄᑭᓐ ᐋ ᐃᔑᓈᑯᐦᒡ᙮ ᐋᐅᒄ ᐆ ᐋᑳ ᑯᔨᔅᒄ ᐅᐦᒋ ᐃᐦᑎᔨᓐ ᒫᒀᒡ ᐊᔅᒌᐦᒡ ᑳ ᐹᒧᐦᑖᔨᓐ, ᐃᑎᑰ᙮ ᐋᑳ ᑯᔨᔅᒄ ᐅᐦᒋ ᐃᐦᑑᑑᑦ ᐊᐙᓐ, ᐃᑎᑰ᙮ ᓂᒥ ᓂᐦᐋᔨᒥᑰ ᒑ ᒌ ᐲᐦᒋᒑᑦ᙮ ᓲᐦᒃ ᑳ ᐐᐦ ᐲᐦᒋᒑᑦ᙮
ᒦᓐ ᐱᔮᒋ ᒌᐙᑦ᙮ ᒦᓐ ᐅᑖ ᐙᐦ ᐃᑐᐦᑖᑦ ᐅᑖ ᐋ ᒌ ᐃᔮᑦ, ᐅᑖ ᐋ ᒌ ᑯᔥᑎᐦᒃ᙮ ᒦᓐ ᐊᔮᐱᒡ ᒀ ᒀᔑᓈᑯᓂᔨᒡ ᓈᔥᒡ, ᐃᔮᐱᐦᐙᑦ ᐊᓂᔮᐦ ᒋᔥᑐᐦᑭᓐᐦ᙮ ᒥᔮ, ᓂᒥ ᐃᑖᔨᐦᑎᒽ ᐊᓂᑖ ᐐ ᒑ ᒌ ᐃᑐᐦᑖᑦ᙮
ᒦᓐ ᐱᔮᒋ ᒌᐙᑦ᙮ ᐋᒄ ᐅᑖ ᐋ ᐃᑐᐦᑖᑦ, ᐅᔮ ᑳ ᐐᐐᑎᔑᐦᐙᑭᓂᐎᑦ, ᐋᑳ ᐅᐦᒋ ᓂᑐᐙᔨᒫᑭᓂᐎᑦ ᒑ ᐲᐦᒋᒑᑦ᙮ ᒀᐃᑐᐎᑖᑦ ᒀ ᐅᔮ ᐅᐐᐦᒀᔮᒻ᙮
ᒥᔮ, ᐙᑎᐦᑖᑦ ᒀ ᐊᓂᔮᐦ ᒋᔥᑐᐦᑭᓐᐦ᙮ ᒦᓐ ᒀᑎᑯᑦ ᐊᓂᔮᐦ ᐊᐙᔨᐤᐦ᙮ ᑖᐹ ᒋᑭ ᒌ ᐹᒋ ᐲᐦᒋᒑᓐ᙮ ᑖᐹ ᑯᔨᔅᒄ ᑯᐦᒋ ᐃᐦᑎᓐ ᒫᒀᒡ ᑳ ᐃᐦᑖᔨᓐ ᐊᔅᒌᐦᒡ, ᐃᑎᑰ᙮
ᒥᔮ, ᐅᔮ ᐅᐐᐦᒀᔮᒻ, ᐅᔮ ᒫᒃ ᒫᒀᒡ ᐃᔮᐱᐦᐙᔨᒡᐦ, ᐹᐦᑎᑖᐙᐱᓂᐦᒃ ᐊᓂᑖ᙮ ᑯᔮᑦ ᐅᔮᔨᐤ ᐹᐦᑎᑖᐙᐱᓂᐦᒃ ᐅᐐᐦᒀᔮᒻ, ᐋᑯᑦ ᒑ ᐃᐦᑖᔮᓐ ᓈ ᓂᐐᐦᒀᔮᒻ ᐋ ᐃᐦᑎᑯᐦᒡ, ᐊᔨᐤ᙮
ᓈᔥᑏᒡ ᒀ ᓈᑖ ᒋᐦᒋᐙ ᐲᐦᑎᑖᐙᐱᓂᐦᒃ᙮ ᐋᐅᒄ ᒫᒃ ᐊᓐ ᐙᐦᒋ ᐃᓈᓂᐎᒡ, ᓈᔥᑏᒡ ᒥᓯᐙ ᒌ ᐋᔪᐎᐦᑖᐤ ᒑᒀᔨᐤ ᑳ ᐃᑖᑭᓂᐎᑦ᙮
ᑭᔮ ᒋᔖᒥᓂᑑᐦ ᒌ ᐋᔪᐎᐦᐋᐤ, ᒌ ᐃᓈᓂᐤ᙮ ᒌ ᐊᔨᐤ ᐊᓐ ᐊᐙᓐ ᑳ ᑎᐹᒋᒧᑦ᙮ ᐋᐅᒄ ᐊᓐ ᒀᔅᒀᐹᑭᐦᒡ ᐊᓐ ᑎᐹᒋᒧᐎᓐ, ᐊᓐ ᐋᑎᔫᐦᑳᓐ᙮ ᐋᑎᔫᐦᑳᓐ ᐙᔥ ᐊᓐ᙮
